ACARA PARTANGIANGAN PESTA SAUR MATUA

 

                       A  C  A  R  A       K  E  B  A  K  T  I  A  N

 

U : ULUAN                        H : HURIA

1.   PAMUHAI : Joujou marsomba tu Debata

U : Hamu angka na hinaholongan di bagasan Goar ni Tuhanta Jesus Kristus. Pungkaonta ma ACARA PARTANGIANGAN PESTA SAUR MATUA (OP JEMIMA DOLI) PDT. L. SIREGAR (+) dohot (OP JEMIMA BORU) T. Br. SILALAHI (+) sadarion, Antong tapahibul ma rohanta asa dibagasan Dame  dohot las ni roha hita martangiang dohot mamuji goar ni Debata pardenggan basa i.

H : Bongoti ma rohanami na punguon ale Tuhan  asa marsangap Ho, marhitehite ulaon nami sadarion.

U : Antong, tapuji ma Tuhanta di bagasan roha na mandok mauliate tu Debata, Marende ma hita.

2.     Marende  BE. 10:1+4 “ Hupuji Hupasangap Ho ”

Ø  Hupuji hupasangap Ho, Amang pardenggan basa/ ai jadijadianMu do sude angka na masa/ ditompa Ho do sasude/ dagingku ro di tondi pe pinuji ma goarMu.

Ø  Tongtong pasangaponhu Ho, saleleng au mangolu/ paratarataon ku do barita digoarMu/pamatang dohot tondingki ingkon mamuji sangapMi/ pinuji ma goarMu.

 

3.   VOTUM / INTROITUS

U : Marhitehite goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia, Amen. Marolopolop ma hamu ale angka partigor mangasahon Jahowa talup do marende angka na unjur marroha.

H : Marlasniroha ma hamu, ale angka partigor di bagasan Jahowa, jala puji  hamu ma goarNa na badia i.

Keluarga: Pinuji ma Debata, na so manulakhon tangiangku manang asi ni rohana pe sian au. Sai Pujionku do angka pambahenan ni Jahowa, ai sai ingotonku do halongangan angka na binahenNa i sian na robi.

U : Na denggan situtu do mamuji Jahowa dohot mangendehon GoarMu ale na tumimbul.

H : Mamaritahon asi ni rohaM manogotna i dohot hasintonganMi bornginna i.

U : Oloi hamu ma Jahowa marhitehite las ni roha, ro be ma hamu tujolona marhitehite olopolop.

H : Ai pardenggan basa do Jahowa, rodi saleleng ni lelengna do asi ni rohana, jala marsundutsundut do hasintonganna.

U :  Haleluya,  Martangiang ma hita:

      Mauliate dipasahat rohanami tu Ho Debata Amanami, ala asi dohot holong ni rohaM na mandongani hami, jala mangaramoti daging, nang  tondinami. Diloas Ho marlasniroha hami mangulahon ulaon pesta saur matua (OP JEMIMA DOLI) PDT. L. SIREGAR (+) dohot (OP JEMIMA BORU) T. Br. SILALAHI (+). Ale Tuhan ramoti jala horasima hasuhutonnami, sai lehon ma dame dohot hasonangan di nasida di namangulahon ulaon sadarion. Manang ise pe naro tu ulaon on sai tong ma i mamboan dame dohot pasupasu tu hasuhuton. Sai tiroi ma nasida mangulahon ulaon on asa di bagasan roha dame, di bagasan holong na sian ho nasida patupahon ulaon adat on gabe bahen hasangapon di goarMu. Sai Jalo ma tangiangnami on marhitehite Jesus  Kristus Tuhan nami,

U+H: Amen.

 

4.Marende BE. 707 :1 “Hagogoon Dohot Apulapul”

Ø  Hagogoon dohot apulapul do dilehon Tuhan i tu au/ganup ari au ditogutogu, ganup tingki di ondingi au/ ai hombar tu lomo ni rohaNa, do dilehon Tuhan i tu au/ ro marsorin arsak las ni roha haporseaon ku dipatau.

 

5.   Puji-pujian ala panarihonon ni Debata Psalmen 23: 1 -6

U    : Hata ni Debata laho mananda angka pasu-pasu naung ta jalo di ngolunta on. Jahowa siparmahan au ndang tagamon hurangan ahu.

Keluarga: Dipatongon do ahu tu jampalan angka na lomak, ditogutogu do ahu di lambung aek hasonangan.

H    : Dipasabam do rohangku, ditogu do ahu di dalan hatigoran, alani Goarnai.

Keluarga: Ai nang pe mardalan ahu di rura ni linggoman ni hamatean, ndang huhabiari parmaraan, ai Ho do mandongani ahu tungkotMu dohot batahiM mangapuli ahu.

H : Ho do manutup meja di jolongku maradophon angka musungku, dimiahi Ho do angka ulungku, suksuk do panginumonki

U :  Tongon tahe denggan basa dohot asi ni roha mangihutihut ahu saleleng ahu mangolu, jala dung mulak ahu masuhanku ma bagas ni Jahowa salelenglelengna. Ido sahatana! Martua ma angka na tumangihon Hata ni Debata, na umpeopsa jala na mangulahonsa.

H   : Amen

 

6.   Marende BE 753 : 1 “ Dipardalanan Jesus di jolongku “

      Di pardalanan Jesus di jolongku, holong ni tanganMi manogu au. Nang di ngolungku Ho do sombaonku, tung sonang mardalan raphon au.

      Reff: Huboto do tangkas panoguonMu, ditiop Ho tongtong do tanganki. Sahat rodi ujung ni pardalananku, togu ma au jonok tu lambungMi.

7.   Tangiang Pangondianon (sian Hula-hula)

 

8.   Marende BE. 826 : 2  “ Gohi Au Tuhan Marhite Hatami ”

Gohi au Tuhan marhite hataMi, gohi au Tuhan marhite hatami,na mauas do tondingku O Tuhan di hatami, gohi au Tuhan marhite hatami.

 

9.   Jamita

10. Marende BE. 806 : 1 - 3 “ Aha pe masa dingolungkon ” P. Pelean

Ø  Aha pe masa dingolumon, Tuhan manjaga ho/ holong na do mangondihon ho, Tuhan manjaga Ho/ Reff. Tuhan manjaga ho, las pe roham, marsak pe ho/ sai di ramoti ho, Tuhan manjaga Ho.

Ø  Sai disarihon do ngolumi, Tuhan manjaga Ho/ sai ditangihon tangiangmi, Tuhan manjaga ho/ Reff. Tuhan…

Ø  Molo borat siporsanonmi, Tuhan manjaga ho/ tung pe golap parnidaanmi, Tuhan manjaga ho/ Reff. Tuhan ….

 

11. Tangiang Panutup

U :  Ale Tuhan Debata, parasi roha nasumurung! Mauliate ma rohanami tu Ho, ala godang ni asi dohot holong ni rohaM. Di urupi ho do pomparan on, patupahon partangiangan dohot pesta saur matua. Ndang tagamon so godang halojaon, parungkilon dohot holsoholso ni rohanasida laho patupahon angka na ringkot tu ulaon on. Alai pos do roha nami sude gabe dimpos jala sirsir do bahenonmu saluhutna. PasupasuM do i Tuhan jala hupuji hami ma goarMu ala ni saluhutnai.

Keluarga : Di na marlasniroha hami sadarion, hupasahat hami jala hupagomgomhon hami ma tu ho saluhut ulaon on, tarlumobi ma di adat habatahon nami asa saluhut na hupatupa hami on dalan nami ma on mangoloi hataM na badia i, asa marhite ulaon nami on hupatuduhon hami ma diri na marsihaholongon. Antong mian ma Ho di ulaon on marhitehite tondiM, ramoti ma hami mangulahon angka ulaon na uli sadarion ro di salelenglelengna.

U:   Ale Jahowa Debata Ama nami, tu Ho ma tama pasahaton nami puji-pujian. Sai parrohai ma hami tarlumobi dihasuhoton nami on, lam tambai ma pasupasuM tu pomparan Op. Jemima. diangka na metmet imburibur ma godang ma i dao angka sahit sian nasida sudena; di na mauas di hagabeon, sai lehon ma hagabeon; na mangalului jampalan na lomak patongon ma jampalan na lomak; jala sai jumpa ma angka pinompar na saur matua di nasida. Sai Marsangap ma GoarMu jala tarpasupasu hami saluhutna marhitehite AnakMu Tuhan Jesus Kristus Tuhan nami, Amen

     Tangiang Pelean + Ale Amanami + Pasupasu + amen,  amen, amen