ACARA PARTANGIANGAN BORSAK MANGATASI NABABAN

TATA IBADAH PARTANGIANGAN

BORSAK MANGATASI NABABAN ANAK, BORU DOHOT BERE KALIMANTAN SELATAN

Minggu, 15 Oktober 2017

1.      Joujou tu parsaoran : Horas ma di hita saluhutna.         

 L = Liturgist ; J = Jemaat

L :     Hamuna angka dongan, marpungu do hita dibagasan tingki on, ditonga-tonga ni inganan on di Partangiangan Borsak Mangatasi Anak Boru dohot Bere, bagasma pamujionta tu Ibana

J :      Tama do tutu pujionta Debata sian nasa rohanta, sian nasa ate-atenta dohot sian nasa gogonta. Holan ala asi ni RohaNa do umbahen na boi hita marpungu manghalas-hon sude denggan basa Na i tu hita

L :     Mauliate ma tutu di Tuhanta na rade mandongani dohot mangaramoti hita, antong manghalashon saluhutna i, tadok ma songon nidok ni situatua; Disi sirungguk disi sitata, ia dison hita hundul marpungu saluhutna, dison ma hita rap dohot Amanta Debata.

J :      Gabe ma tutu jala horas! Na uli basa do Tuhanta i, jala na mamora di pasu-pasu, asa songon na nidok ni situatua ma dohonon ; Dengke ni Tarabunga peak di Pinggan pasu, horas ma hita saluhutna Debata ma mamasu-masu.

L :     Nunga marpungu hita tutu dison Pomparan ni Ompunta Borsak Mangantasi Nababan dibagasan las ni roha, nunga nangkok hita sian toruan marpungu di dolok ni Debata di inganan on. siangkupna songon na hundul, sidonganna songon na mardalan. ai marangkup do nauli,mardongan do na denggan. Dia ma tutu nidok ni parpunguanta sadari on

J :      Gabe ma tutu jala horas! Napuran ni Dairi niatup ni boru Angkola, Na patupa Parangiangan 13 Oktober do hita sadari on anggiatma manghorhon tu nauli  mamboan sangap tu Tuhanta.

L :     Gabe ma jala horas! Taolophon ma Jahowa, taoloi ma Jahowa marhite-hite las ni roha, beta ma tu jolo-Na marhite-hite olop-olop:

Gok lasni roha do au dingolungkon, dingolungkon dingolungkon.

Gok las ni roha do au dingolungkon tongtong dingolungkon

Mauliate, gok las ni roha, maringan holongMi Tuhan di au,

Mauliate, gok las ni roha maringan holongMi Tuhan di au.

2.      PANGGILAN BERIBADAH!

L :     Sadarion, ari na nijadihon Debatanta tu hita Pomparan Borsak Mangantasi Nababan, dipungka Ompunta na parjolo i Partangiangan na di tanggal           13 Oktober 1950 di Siborongborong, dinalaho pasadahon roha angka pomparan ni Ompunta Borsak Mangantasi Nababan jala mangido pasupasu ni Tuhan Debata tu sude angka omparan ni Ompunta. Alani i, tapujipuji ma Ibana na tongtong pasadahon hita di inganan on.

R :     Amen

L:      Lasma rohanta, tajangkonma haluaon ni Debata marhite marende hita sian B.E no. 4:1-2

3.      Marende B.E No.4 :1-2 (SAI PUJI DEBATA)

1.      Sai puji Debata, Dibahen asi rohaNa

Huhut tongtong basa dinasa tinompaNa

Riama hita be mamuji Debata.

Ai sesa do nuaeng dosantai dibahen

                                                    Jongjong

2.      Disuru Debata AnaknNa Jesus Kristus

Jadi masai arga do hita on ditobus

Diporsan Jesus i dosanta sasude

Asa mudarNa i paias hita be.

4.      VOTUM.

L :     Marhite hite goarni Debata Ama, dohot Anak dohot Tondi Parbadia.

R:     Amin  

L:      Na mamolus do anggo portibion rap dohot na pinangido ni rohanna, alai na mian ro disaleleng ni lelengna do na mangulahon lomo ni roha ni Debata.

J :     Haleluya, Haleluya, Haleluya

L :     Ale Tuhan Debata, Parasiroha jala Pardengganbasa na sumurung! Tama do nian hona uhumMu hami ala ni garis ni rohanami mida HataM.

J :     Alai sai sesa ma dosanami jala salpuhon sude pambahenannami na hurang i.

L :     Sai unang unsati asi ni rohaM sian hami.

J :     Sai tambai ma pasupasuM dohot gogo na sian banua ginjang tu HuriaM, asa hupuji hami Ho, dung malua hami sian pardangolan na dihasiangan on.

L :     Ala ni Tuhan Jesus Kristus, Tuhannami.

L,J;   Amen              ---- Hundul -------

5.  MARENDE B.E 587:1-2 (TAENDEHON LAS NI ROHA)

1.      Taendehon las ni roha pasangaphon Tuhan i,
Roha holong na mangonjar laho mangendehon i,
Ganup ari ganup borngin unang lupa ho disi.
Angka ende na ummuli si pasangap Tuhan i,
Nang parhinaloan i baen pasangap Tuhan i.

2.      Taendehon las ni roha, sipadame roha i.
Tung dao do bada-bada, dohot angka hosom i.
Hadameon ni Tuhanta i, do sihirimon i
Tapalambas ma rohanta, mida angka dongan i
Na martua do sude, na lambok maroha i.

6.      RENUNGAN SITUASIONAL & MANOPOTI DOSA

L1    :   Hamu Pomparan Borsak Mangantasi Anak, Boru, Bere dohot Ibabere di Inganannon, Sadarion marningotma hita di Partangiangan Nababan naung dipukka di tanggal 13 Oktober taon 1950 di Siborong borongborong. Marpunguma sian maragam luat dipomparan Nababan di toko ni Sijabujabu marpanatap tu Tuhan ala hahurangan dohot hagalehon siala dosa dohot pamabahenan Pomporan Borsak Mangatasi Nababan na so tama di adopan ni Debata.

L2    :   Disi do patar angka pangalaosion tu Ibana, hurang pos ni rohanta tu Ibana, gok hagaleon angka natoras maradophon ianakhon; parange ni ianakhon mangarsahi natorasna, hagaleonta maradophon dongan, bangso, masyarakat dohot negeranta. Hagaleonta papatarhon haporseaonta songon siihuthon Kristus di tonga tonga ni portibion. Hagaleonta patureture hasadaonta. Atong tu ise ma pangkirimonta i?

H     : (Mangendehon): BE No.769:1  “Tu Debata do pangkirimon”

Tu Debata do panghirimonki, di tano laut nang awang-awang i. Ibana do haposanki tongtong do diramoti langkangki. Torop pe mara manahopi au, Debatangki do sumarihon au, pos rohangki, sonang do au. Ibana do na mandongani au.

L3    :   Molo tatailihon pe tu pudi, asa dapotan bisuk do hita sian angka na tabolus i, ai i do guru di hita mangalangka jala patupahon Partangiangan Borsak Mangatasi Nababan naung mardalan sahat tu Partangiangan na pa onom puluh pituhon. Godangna i na masa di pomparan ni Ompunta Borsak Mangatasi Nababan on na mambahen tarsonggot jala mabiar hita: bencana alam, angka marhabotni roha, hagaoron dohot lan na asing. Disaluhut angka na masa i, dia ma sidohononta tu Debata?

H     : (Mangendehon): BE No.769:2  “Tu Debata do pangkirimon”

Amporiki nang bungabunga i, ro di sude na tinompaNa i. Na metmet nang na balga i, Ibana do na marmuduhon i. Torop pe mara manahopi au, Debatangki do sumarihon au, pos rohangki, sonang do au Ibana do na mandongani au.

L4    :   Sintong do i dongan, “Torop pe mara manahopi au, Debatangki do sumarihon au, pos rohangki, sonang do au Ibana do na mandongani au.” Alani I tabegema hata ni Debata na tarsurat di Roma 1:16-17, na mandok:

H     :   Ai ndang na huhailahon barita na uli i, ai hagogoon ni Debata do i, paluahon nasa na porsea.  Ai dipapatar do disi hatigoran ni Debata, na sian haporseaon tu haporseaon;

L5    :   Ale Tuhan Debata parasiroha na sumurung! Na ro do hami tu joloM manopoti dosanami na godang i. Nunga hubolus hami sada taon; Huhilala hami do godang ni dosa dohot pangalaosionnami manipat na sataon on. Asi ma rohaM, sesa ma luhut dosanami i.

H     :   Hupabotohon ma tu Ho sude dosangku jala ndang hutabunihon hajahatongku tu Ho. Asi ma rohaM, sai pangolu ma ahu!.

L6    :   Sai asi ma roham, ale Debata, sai jangkon ma hami jala sesama dosanami, ala ni Anak haholongan ni rohaM, Tuhan Jesus Kristus, Tuhannami. Amen.

H     :   (mangendehon BE No.432:1-2  “Sian hurungan ni dosangki” BL.292

Sian hurungan ni dosangki, ro au tu Ho. Ro au tu Ho. Tu haluaon di mudarMi, Jesus au ro tu Ho. Nasa rohangku malum hipas, gabe mamora, nang pe pogos. Sian jeangku ro au tu Ho, Jesus au ro tu Ho.

L7    :   Tajalo ma apulapul hasesaan ni dosa sian Debata taringot tu angka dosanta. Parasi roha jala pardenggan basa do Jahowa, lambat tarrimas jala parasi roha godang. Ndang tongtong Ibana manorui, jala ndang gotos rohaNa saleleng lelengna. Hasangapon ma di Debata na di ginjang. Amen (Hundul)

7.      Marende B.E No.467:1-2

1. Asi ni rohaM hupu ji ala Ho manobus au. Di paIas Ho rohangku, ga-be soranganMu Au. IngananMu rohanami. TondiMi manggohi i. Pangke dohot ngolunami gabe ulaulaMi.

2. Sai ramoti ma rohangku, asa boi gohanMu au. Sai mabaor ma pasupasu nang marhite sian au, IngananMu……..

8.      Epistel Jesaya 25:1-9

L:   Ale Jahowa, ho do Debatangku, sai patimbulonku do ho, pujionku do goarmu, ai nunga mambahen halongangan ho; angka sangkapmu sian narobi pe na bonar jala na sintong do.

J:    Ai nunga gabe pantil batu huta i dibahen ho, huta na gonting i gabe maloha; bagas bolon ni angka paisolat malua sian huta i, na so sipaulion be salelenglelengna.

L:   Dibahen i ingkon pasangapon ni bangso na marhuaso i ho, jala ingkon habiaran ni huta ni angka bangso pandobo ho.

J:    Ai ho do partanobatoan ni na dangol, partanobatoan ni na pogos di hagogotanna; haporusan maradophon udan tipotipo, parlinggoman maradophon ari na marngiarngiar, ai doshon udan tipotipo tu dorpi parlongos ni muruk ni halak sibahen gogo.

L:   Songon ari na marngiarngiar di tano bangkalbangkal dipaonjap ho hariburon ni halak na buro; morpo do ari na marngiarngiar marhitehite linggom ni ombun, ingkon songon i pasohotonmu ende olopolop ni angka sigostang botohon.

J:    Jadi padirion ni Jahowa Zebaot ma di saluhut bangso sada haroan di dolok on, haroan na talmis, haroan sian tuak anggur naung leleng, sian sipanganon na hojal, sian angka anggur na galia na pita.

L:   Dung i pasisionna ma di dolok on hirehire na hinungkuphon tu saluhut angka bangso dohot pangkuphupi na hinungkuphon tu saluhut angka parbegu.

J:    Bondutonna ma hamatean salelenglelengna jala apusan ni Tuhan Jahowa ma iluilu sian nasa bohi, jala padaoonna ma haurahon ni bangsona di sandok tano on, ai nunga Jahowa mandok i.

L:   Jadi dohonon ni halak ma di ari na sasada i: Ida ma on do Debatanta, na itahaposi, na mangurupi hita, dison do Jahowa na itahaposi. Marolopolop ma hita jala marlas ni roha mida hatuaonna i.

L:   Martuama angka na tumangihon hata ni Debata jala naumpeopsa.

L/J:   A M I N.

9.      Marende B.E. No.741: 1  ( NANG RO PE HABAHABA)

Nang ro pe haba-haba i / Tuhan do pangondianmi,

Nang pe humuntal tano I / Tuhan do pangondian mi.

Ai Jesus do partanobatoan i di tano on di tano on,

Ai Jesus do partanobatoan i, dolok partahananta i.

10.  TANGIANG PANGONDIANON

11.  Marende B.E No. 758:1-2 (JAHOWA PANGURUPI)

1.      Jahowa pangurupi disi ulaonmi.
Dilehon pos ni roha di ganup tingki i,
Nan pe sipata ganggu haporseaonmi
Jamot tongtong Tuhanmu manjaga ngolumi.

2.      Jahowa las ni roha saleleng ngolumi,
Ibana haroroan ni nasa na uli
Ai disarihon Jesus sude naringkot i,
Halashon panoguon ni Jesus Tuhanmi.

12.  JAMITA   : Pdt.Anry Krismanto Nababan,S.Th, M.Pd.K

13.  Marende sian Mars Nababan (Papungu Pelean)

1. Tubu ditano tipang do marga Nababan
   Gabe ditumpak Tuhan rarat ma tu Humbang
   Ari sampulu tolu bulan sampulu i
   Pungu mangido ngolu tu Tuhan Jesus i
2. Hamu ale donganhu marga Nababan i
   Pahombar ma langkamu lomo ni Tuhan i
   padao ginjang ni roha, sai tiop burju i
   asa denggan martua, uli tinujumi
3. Pasada ale tuhan hami nababan on
   Ido dalan ni tua ro tu joloan on
   Sahat ma pasu-pasu tu hita Nababan
   Sahat ma nang tu Boru lehonon ni Tuhan
4. Horas ma Negaranta manggomgom Nababan
   Tangiang tu Tuhanta sai maju berkembang
   Sahat-sahat ni solu, sahat tu tiga ras
   Leleng hita mangolu, gabe jala horas

14.  DOA PENUTUP/ BERKAT.

--Ibadah Selesai---