Liturgi Advent Natal Distrik XXVII Kaltimsel Kaltara

 “Jala Dame ni Kristus i ma mangarajai di bagasan rohamuna”

(KOLOSE 3:15)

HKBP BANJARMASIN RESSORT BANJARMASIN

05 DESEMBER 2017

I.         PANGARADEON DOHOT PROSESI

Sude Parhalado Na Gok Tingki, Panitia Adven/Natal, Sintua na marhobas dohot Sikola Minggu (sitiop Simbol Adven, Silang, Lilin dohot Bibel), marpungu di Konsistori laho prosesi mamongoti Gareja. Di tingki mardalan barisan Prosesi, jongjong ma saluhut ruas di ingananna be, jala Musik dohot Song Leader mangendehon BE No. 651 “Huria na Huhalongi Hami”

♪  Huria na huhaholongi hami napinajongjong ni Tuhanta i/ Tung na so lupa sian rohanami, huria i dohot ruasna i/ Di nasa hasusaan tongtong do i manahan/ Manggogo pe angka galumbangi, Tuhanta do na pademakhon i/ Martua do na hot di Tuhan i

♪  Huria na hinophop ni Tuhanta, sai mian ma di haholongon i/ Sahata ma pangula nang ruasna manomba Jesus na marsangap i./ Sai timbul hadameon, lam tang haporseaon/ Manggogo pe, d.u.

II. IBADAH

01. Pamuhai ( L : Liturgos          H: Huria)

L   :  Hamuna angka dongan na hinaholongan ni Tuhanta Jesus Kristus, mansai las do roha marnida parsaoranta di joro ni Tuhanta di botari on mamestahon Pesta Advent-Natal HKBP Distrik XXVII Kaltimsel-Kaltara na disondangan ni Tema : “Jala Dame ni Kristus i ma mangarajai dibagasan rohamuna”. Sai sahat ma na uli, na denggan jala parhorasan ma di hita sude ditumpak Debata. Antong patimbul ma Tuhanta na sai tongtong marmudumudu pardalanan ni ngolunta dohot hurianta

H  :  Dipatimbul rohangku do Tuhan i. Mariaia do tondingku mida Debata, Sipalu ahu. Ai ditatap do haetehon ni naposona on. Parhatuan ma ahu olat ni on marsundutsundut. Na badia do Goarna i, ai marsundutsundut do asi ni rohana mida angka na manghabiari Ibana.

L   :  Antong tu hamu angka dongan, dilas ni rohanta di tingki on, janghon hamu ma Barita na uli, las ni roha dohot hadameon sihangoluhononta. Ibana siboan tua dohot las ni roha di hita, Alani tapasangap ma Ibana.

02. Marende BE No. 648 : 1, 3-4 “Sangap di Debata Ama”

♪  Sangap di Debata Ama, sangap di AnakNa i/ Nang di Tondi Parbadia, Debata na songkal i/ Haleluya, puji Tuhan salelenglelengna i

♪  Puji Raja sian Surgo, Raja ni huria i./ Raja ni saluhut bangso, Tuhan na sun sangap i./ Langit tano sai endehon sangap di goarNa i

-------------------------Jongjong------------------------

♪  Hasangapon salelengna tarbege di Surgo i./ Marsaringar do soara ni na tinompaNa i./ Haleluya, puji Tuhan Debata na songkal i.

03. Votum – Introitus – Tangiang

L   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on

H  :  Amen

L   :  Ahu sijadi hatiuron dohot sitompa haholomon; sibahen hadameon dohot sitompa hamagoan. Ahu do Jahowa sibahen saluhutna i.

H  :  Manetehi ma hamu angka langit sian ginjang, jala diusehon angka ombun ma udan hatigoran. Buha ma tano on jala diparbuehon hatuaon dohot hatigoran.

L   :  Angka langit do mamaritahon hamuliaon ni Debata, jala jadijadian ni tanganNa do pinaboa ni na ratarata ni langit i. Haleluya

H  : (Mangendehon) Haleluya, Haleluya, Haleluya

L   :  Martangiang ma hita! Ale Amanami jala Debatanami! Na mandok mauliate do hami tu Ho sian nasa rohanami, ala disuru Ho AnakMu, Tuhan Jesus Kristus, na paluahon hami sian dosa dohot hamatean. Hupangido hami, sai patiur jala rajai ma rohanami marhitehite Tondi Parbadia i, asa unang hu rohanami mida hametmetonNa i. Urupi hami, asa lam hutanda hami Ibana Raja naung ro i, sisombaon ni sandok jolma na di liat portibi on.

H  :  Amen

04. Marende BE No. 778 :1-2 “Ai Ise do Tumompa angka bunga”

♪  Ai ise do tumompa angka bunga marworna na mansai uli?/ Pajagar duhut narumatarata? Alushu : Debata do i./ Hupuji Ho tongtong ale Debatangki, dibaen pangaramotiMi

♪  Ai ise do mambaen angka pidong marende tung uli tio?/ So marhauma hape tong do butong? Alushu : Debatangku do./ Hupuji Ho tongtong, d.u.

05. Liturgi I : “Panompaon”

L   : Di mulana i, mansai denggan do natinompa ni Debata nasa na adong di Portibion.  Uli ni bunga-bunga i, tongam ni dolok dohot tombak na ratarata i, lambok na i suara ni angka pidong na marendeende i, songkal ni soara ni ronggur i dohot do muse parngongos ni alogo na lambok i.

R   : (Mangendehon BE No. 192:2-3 “O Tuhan Jesus Raja ni Sudena”

♪  Tombak denggan, hauma pe denggan do na rumatarata i/ Jesus dumenggan, Jesus gumodang sibaen las ni rohanta i

♪  Bulan tiur do, bintang pe torang do, nang mata ni ari pe/ Jesus tumiur, Jesus tumorang, sumurung sian i sude

L   : Tabege ma Dipajojor taringot tu panompaon ni Debata di portibi on.

L1 : 1 Musa 1 : 3-5            (Balikpapan)

L2 : 1 Musa 1 : 6-8           (Banjarmasin)

L3 : 1 Musa 1: 9-10+13    (Sentosa Samarinda)

L4 : 1 Musa 1 : 14-15+19 (Merak Samarinda)

L5 : 1 Musa 1 : 20-21+23          (Bontang)

L6 : 1 Musa 1 : 24-25        (Tarakan)

L7 : 1 Musa 1 : 26             (Sangatta)

L8 : 1 Musa 1 : 27              (Balikpapan Baru)

L9 : 1 Musa 1 : 28              (Balikpapan Utara)

L10 : 1 Musa 1 : 31           (Berau)

L   : Songon i ma panjadijadi ni langit dohot tano, di na tartompa angka i, di ari panompaon ni Debata Jahowa di tano dohot langit. Amen

06. Koor Ina HKBP Balikpapan :

07. Marende BE No. 569 : 1-2 “O Debata Tung Longang do”

♪  O Debata, tung longang do rohangku, molo hubereng na tinompami/ Saluhut bintang, hilap dohot ronggur manghatindangkon hasagaponMi/ Marende au Tuhan mamuji Ho, o Debata sangap do Ho/ Marende au Tuhan mamuji Ho, o Debata sangap do Ho

♪  Di ladang, di adaran dohot tombak, marende pidong tung mansai sonang/ Punsu ni dolok, sunge dohot rura, mamaritahon sangapMi Tuhan/ Marende au Tuhan mamuji Ho, d.u.

08. Liturgi II : “Dosa”

L    : Atik pe naung denggan ditompa Debata nasa na di portibi on, jala tangkas dilehon mandat tu jolma i laho mangaramoti nasa na tinompa ni Debata, hape ndang jumpang haunduhon dohot pangoloion ni jolma di patik i, gabe madabu ma joma i tu gambolisop ni dosa i. Sada sian dosa ni jolma na mian sahat tu tingkion, jala didok do i “dosa modern”, i ma na so adong be rasa hormat ni jolma i tu angka na tinompa ni Debata, isara ni na so mangargahon tano, aek, auangauang, pahanpahanan dohot angka suansuanan. Nang pe tangkas do diboto jolma i, ianggo na parjolo mangae panghorhon ni na binahenna i laos jolma i sandiri do. Antong tabege ma jolo barita na mardomu tusi!

L1  :      Ai taboto do, sai tong dope rap marhoi jala mambebe nasa na tinompa (Sebab kita tahu, bahwa sampai sekarang segala makhluk sama-sama mengeluh dan sama-sama merasa sakit bersalin, Rom 8:22). (TANJUNG REDEB-BERAU)

L2  :      Tano dohot portibi on marhoi jala mambebe. Najolo mura do tubu angka suansuanan di tano i dibahen gaburna. Alai anggo nuaeng hira na holan margogoihon pupuk kimia dohot pestisida nama asa tubu suansuanan di tano i. (BALIKPAPAN UTARA)

L3  :      Aek pe marhoi jala mambebe pangkorhon ni angka aek panirisan (limbah) na marisi rasun sian angka pabrik-pabrik. Laut pe songon i, marhoi jala mambebe hinorhon ni kapal-kapal Tanker na mangusehon manang na piga juta galon miak na tata (minyak mentah) si ganup taon. Hinorhon ni i, krisis na umbalga na ingkon adopan ni jolma tu ari na mangihut i ma krisis air minum.  (BALIKPAPAN BARU)

L4  :      Songon i do nang auangauang (udara) tong do marhoi jala mambebe. Hinorhon ni angka asap ni kendaraan dohot pabrik na so lam terkendali gabe marpangkorhon tu pernapasan ni jolma. Dung i, lapisan ozon di Atmosfer nunga lam tu bidangna na bonsormanang bolong. Hape lapisan ozon i do na manaring jala na mangalinggomi hita sian radiasi sinar ni mataniari. Jadi molo lapisan ozon bolong, hulinghulingta on pe gabe hona radiasi ma jala na boi patubuhon kanker kulit. Dung i, portibi on pe lam tu mohopna do. Ala lam tu mohopna portibi on, es di kutub pe gabe mencair, alani i, permukaan aek ni laut pe lam nangkok , jala diparetongkon 10-20 taon na naeng ro manang na piga negara di kepulauan Pasifik dikuatirkan gabe lonong.  (SANGATTA)

L5  : Pahanpahanan pe tong do marhoi jala mambebe. Mangihuthon angka peneliti nang pande bisuk, rata-rata 20 spesies manang ragam ni angka pahanpahanan na mate ganup tingki (per detik) hinorhon ni alam na so bersahabat be nang tu angka pahanpahanan. Ndang dope alani angka pembakaran hutan na secara tidak langsung palaohon angka binatang I sian jabuna. Dohot ragam ni angka ulah ni jolma dope na marpardomuan tusi.   (TARAKAN)

L6  :      Angka suansuanan pe songoni do, marhoi jala mambebe. Ndang denggan be partubu ni angka suansuanan, ala nunga mardojal tano I hinorhon ni angka pupuk kimiawi dohot angka pestisida. Gabe marmatean ma angka gea na pagaburhon tano i. Ndang mamboan hahipason be angka suansuanan na sian ni jolma I, ala inganan hatubuanna pe ndang sehat be.    (BONTANG)

L    :      Nunga tabege be songon dia panghorhon ni pangalaho dohot dosa ni jolma i taringot tu angka na tinompa ni Debata. Antong dia ma na naeng dohononta?

L7  :      Ianggo ahu ningku do: Asi ma rohaM di ahu, ale Jahowa, sai pamalum rohangki, ai dompak Ho do au mardosa. Ias situtu ma ahu buri sian hajahatonhu, jala paias ma ahu sian dosangku (Psalm 41:5; 51:4). (MERAK SAMARINDA KOTA)

L8  :      Sai urasi ma ahu sian dosangku marhitehite sanggul, asa tung ias ahu; sai buri ma ahu, asa sumaksak ahu sian itak (Psalm 51:9). (SENTOSA SAMARINDA)

L9  :      Sai hungkupi ma bohim mida angka dosangki, jala sesa ma angka hajahatonhu sudena (Psalm 51:11).   (BANJARMASIN)

L10:      Jadi hupabotohon ma tu Ho dosangku jala ndang huhungkupi salangku; ningku; topotanku ma angka pangalaosingku tu Jahowa jadi marpamuati do rohaM di utang ni dosangki (Psalm 32:5). (BALIKPAPAN)

L     :      Parasiroha jala pardenggan basa do Jahowa, lambat tarrimas jala parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana.

09. Koor Remaja-Naposo HKBP Ressort Banjarmasin : “Lilin-lilin Perdamaian”

10. Marende BE No.44:3-4 “Hamuna na porsea i sai tomu Tuhan Jesus i”

♪  Sigati rohamuna be, sai tanda dosamu sude, paringkot rohamuna;/ manjangkon Sipalua i, na tuat sian surgo i manggarar utangmuna./ Tanda hata hangoluan na binoan ni Tuhanta,/na pasae sude dosanta

♪  Ai molo so diboan ho dosam tu Jesus i nanung ro, ndang saut be ho malua/ Tongtong ma songgop rimas ni Jahowa Debatanta i tu ho na hum manjua./ I pe sude angka dosa hinaroa ni rohamu/ pasesahon tu Tuhanmu

11. Liturgi III : “Panghirimon”

L     : Taon 2018 nunga ditotophon induk ni hurianta HKBP gabe Tahun Kesehatan, Kebersihan dohot Lingkungan Hidup, i ma na marojahan sian hata ni Tuhanta na tarsurat di Jeremia 33 : 6, na mandok :

H    : Ida ma, Ahu sandiri paheheon tu nasida hahisaron dohot hamalumon, jala pamalumonku ma nasida, jala ahu papatarhon tu nasida hadameon dohot habonaron mardapotdapot.

L     : Marhite tahun Kesehatan on, tontu hurianta HKBP ndada sekedar naeng pajongjong “tugu” manang bangunan monumental sambing. HKBP songon sada lembaga gereja na balga di Asia Tenggara, tarlumobi di Indonesia on ingkon gabe pionir dohot motivator manghalaputi ulaon mangharingkothon hahipason, hahisaron, haiason dohot na manjamothon lingkungan hidup, jala hombar do i tu Konfessi HKBP taon 1996 bindu 5, i ma taringot tu Kebudayaan dohot Lingkungan hidup. Antong, tabege ma hata ni Debata laho padasiphon panghirimonta i dohot na pinarsinta ni rohanta:

L1  :      Jesaya 60:1 : Hehe ma ho! Marsinondang ma ho! Ai na ro ma panondangmu, jala hamuliaon ni Jahowa binsar di atasmu.  (BONTANG)

L2  :      Jesaya 60:2 : Ai ida ma, haholomon do manghuphupi tano on, jala hagolapon angka bangso; alai na binsar ne ma Jahowa di atasmu, jala marsinondang hamuliaonNa di atasmu. (MERAK SAMARINDA KOTA)

L3  :      Jeremia 29:7 : Ringkoti hamu huhut hasonangan ni huta habuanganmuna na Hubahen i, jala tangianghon hamu nasida tu Jahowa, ai molo marhasonangan huta i, marhasonangan ma dohot hamu.  (SENTOSA SAMARINDA)

L4  :      Jeremia 17:14 : Sai Ho ma pamalum ahu, ale Jahowa, asa tung malum huhilala; sai Ho ma mangurupi ahu, asa tung dapotan pangurupion ahu, ai Ho do pujipujionhu.  (BANJARMASIN)

L5  :      Jesaya 11:2 : Jadi songgop ma tu ibana Tondi ni Jahowa, Tondi ni habisuhon dohot hapistaran, Tondi ni panuturion dohot hagogoon, Tondi ni parbinotoan dohot biar maradophon Jahowa.  (BALIKPAPAN)

L6  :      Jesaya 32:17 : Jadi hadameon ma upa ni hatigoran, jala pangkorhon ni hatigoran hademahon dohot hasonangan salelenglelengna.   (TANJUNG REDEB-BERAU)

L7  :      Mateus 10:8 : Pamalum hamu ma sahit ni na marsahit, pangolu hamu ma angka na mate, ias ma bahen hamu angka na huliton, pabali hamu ma angka sibolis! Sibasabasa doi tu hamu; antong, basabasahon hamu ma i!  (BALIKPAPAN UTARA)

L8  :      Markus 16:15 : Jadi ninna ma mandok nasida: Laho ma hamu tu liat portibi on; jamitahon hamu ma Barita Nauli i tu nasa na tinompa.   (BALIKPAPAN BARU)

L9  :      Lukas 10:9 : Pamalum hamu ma angka na hansitan na disini; dok hamu ma tu nasida: Nunga sahat harajaon ni Debata tu hamu.   (SANGATTA)

L10:      Ulaon ni Apostel 4:30 : Huhut surdukhon ma tanganmu, laho patupahon hahisaron ro di angka tanda dohot halongangan marhitehite Goar ni Jesus, naposom na badia i!    (TARAKAN)

12. Koor Gabungan : “Bahana Nama Tuhan”

13. Marende BE No. 39: 1+3 “Beha ma panjalongku”

♪  Beha ma panjalongku di Ho, o Tuhanhi?/ Beha ma panomungku di Ho, o Rajangki?/ Sondangi ma rohangku na holom, na bodo/ Ai naeng patupaonhu las ni rohaM di Ho

♪  Ai ndang adong na hurang na pinatupaMon./ Mambaen tu au sumuang  dame ni rohangkon/ Ai di na marsak ahu binaen ni dosa i./ Ro Ho ale Pangolu mandaoni sahithi

14. Liturgi IV : “Adven dohot Natal”

L    : Tema Natal taon 2017 natinotophon ni PGI-KWI  i ma na marojahan sian Kolose 3:15 na mandok :

H   :      “Jala Dame ni Kristus i ma mangarajai dibagasan rohamuna”.

L    : Laos tema on do na gabe tema perayaan Advent/Natal HKBP Distrik XXVII Kalimantan Timur, Selatan dan Utara na tahalashon di bagasan sadari on. Marhite tema Natal on manosohon tu hita asa dame ni Kristus i ma na mangarajai jala na mian di rohanta, pingkiranta jala na patauhon hita patulushon sangkap ni Debata ditongatonga ni portibi on.

L1  :      Jesaya 9:5 : Ai nunga tubu di hita sada posoposo, dilehon tu hita sada anak, pampe tu abarana do sogot harajaon, jala bahenonna goarna: Sipartahi Halongangan, Siulubalang ni Debata, Ama saleleng ni lelengna, Raja ni hadameon.   (TARAKAN)

L2  :      Mateus 5: 9 : Martua ma sibahen dame, ai goaron do nasida anak ni Debata.   (SANGATTA)

L3  :      Johannes 14:27 : Dame do hutinggalhon di hamu; dame na di Ahu, i do Hulehon di hamu. Ndang songon pangalehon ni portibi on pangalehonHu. Unang ma bonsa jala unang ma mabiar rohamuna).   (BALIKPAPAN BARU)

L4  :      Johannes 16:33 : Asa mardame hamu di bagasan Ahu, umbahen na huhahtahon angka i tu hamu. Haporsuhon do jambarmuna di portibi on; alai pos ma rohamuna; nunga talu hubahen portibi on.   (BALIKPAPAN UTARA)

L5  :      Rona 12:18 : Molo tarbahen, intap na tarpatupa hamu, tiop hamu ma dame maradophon halak saluhutna! (TANJUNG REDEB-BERAU)

L6  :      Rom 14:19 : Dibahen i taeahi ma na tau padamehon jala pauliulihon hita sama hita.  (BALIKPAPAN)

L7  :      Epesus 6:23 : Dame ma di angka dongan, dohot holong ni roha raphon haporseaon sian Debata Ama I, nang sian Tuhan Jesus Kristus i!   (BANJARMASIN)

L8  :      Heber 12:14 : Ringkoti hamu ma asa mardame hamu tu saluhut halak huhut asa badia hamu; anggo so i, ndang adong idaonta Tuhan i.   (SENTOSA SAMARINDA)

L9  :      1 Petrus 3:11 : Dipasiding ma hajahaton diulahon ma na denggan; dilului ma dame, i ma dieahi.  

        (MERAK SAMARINDA KOTA)

L10:      Pilippi 4:7 : Jala Dame ni Debata na sumurung sian saluhut roha, i ma mangaramoti angka ateate dohot pingkiranmuna di bagasan Kristus Jesus.   (BONTANG)

15. Pagalak Lilin

(Pinangidohon ma asa ro tu jolo na laho pagalakkon Lilin, jala ditingki na pagalakkon lilin, huhut ma diiringi musik na angonangon sian BE No. 54).

Sipagalak lilin, i ma :

a.     Praeses HKBP Distrik XXVII Kaltimsel-Kaltara

b.     Kabid Marturia HKBP Distrik XXVII Kaltimsel-Kaltara

c.      Kabid Koinonia HKBP Distrik XXVII Kaltimsel-Kaltara

d.     Pendeta HKBP Ressort Banjarmasin

e.     Ketua Panitia Advent-Natal HKBP Distrik XXVII Kaltimsel-Kaltara

f.       Ketua Punguan Parompuan Distrik (PPD)

g.     Mewakili Ruas

16. Marende BE No. 54:1-3 “Sonang ni bornginna i”

♪  Sonang ni bornginna i, uju ro Jesus i,/ Sonang modom do halak sude, holan dua na dungo dope;/ mangingani Anakna, Jesus Tuhanta i

♪  Denggan ni bornginna i, uju ro Jesus i./ tu parmahan di Betlehem i, dipaboa na di Surgo i;/ nunga ro Sipangolu, Jesus Tuhanta i.

♪  Godang ni tua disi di na ro Jesus i,/ Tung malua pardosa muse, sian hamagoanna sude;/ ala ro Sipangolu, Jesus Tuhanta i.

17. Jamita : Kolose 3:15

18. Marende BE No. 591 : 1... “Boru Sion”  

(Papungu Pelean)

♪  Boru Sion las roham, las roham Jerusalem./ Ai na ro do Rajami padamehon ho tongtong./ Boru Sion las roham, las roham Jerusalem

♪  Anak Daud ro ma Ho, pasupasu bangsoMon/ Harajaonmu hot tongtong, dame ma di tano on./ Hosianna, ro ma Ho; pasupasu bangsoMon.

♪  Hosianna ro ma Ho, masuk Ho tu rohangkon./ Baen mardame tondingkon, lao manjangkon haroroM./ Anak Daud ro ma Ho, masuk Ho tu rohangkon

ULAON NA BADIA

1.   Marende BE No. 152 : 1 “Jesus Na mamorsan”

♪  Jesus na mamorsan dosa ni portibi on, pangolu hami/ Jesus na mamorsan dosa ni portibi on, pangolu hami/ Jesus na mamorsan dosa ni portibi on, sai pasonang hami/ Amen, Amen, Amen

2.   Tangiang Ulaon Na Badia (Agenda HKBP)

3.   Marende BE No. 153:1 “ O Jesus naung sineat”

♪  O Jesus naung sineat, di hau na pinarsilang/ RohaM tongtong daulat, nang uju Ho tarhilang/ Marutang hosa hami, ditaon ho dosanami, Asi rohaM o Jesus

4.   Tona Ulaon Na Badia (Agenda HKBP)

5.   Marende (BE No. 154, 155, 86,174,  449, 227, 435,248)

6.   Marende BE No. 9 : 1 “Hupuji Holong ni RohaMu”

♪  Hupuji holong ni rohaMu, o Tuhan Jesus, Rajangki./ Tu Ho hulehon ma tondingku, ai i do pinangidoMi./ Huhalupahon ma diringku, mamingkir holong ni rohaMu

19. Parsuruan tu ngolu siganup ari – Tangiang Panutup

L   : Punguan na hinaholongan ni Tuhanta, nunga tahalashon hatutubu ni Jesus i na mamboan dame tu ganup hita saluhutna, ungkap ma roham jala jangkon ma Rajam.

H  :      (Mangendehon BE No. 605 “Las ma roham”)

♪  Las ma roham Tuhanta ro, gumomgom sasude/ Ungkap roham, jangkon rajam, marende ma sude, marende ma sude/ marende marende ma sude

L   : Dipaingot do hita marhite pestanta di tingki on paboa Ibana do Rajanta i, parasi roha dohot parholong roha siboan dame tu tano on. Alani tajangkon ma dame na sian Kristus i asa mian jala i ma na mangarajai dibagasan rohanta ganup.

H  :      (Mangendehon BE No. 605 “Las ma roham”)

♪  Ibana do Rajanta i, parasiroha i./ Natigor i, na bonar i, parholong roha i, parholong roha i/ parholong parholong roha i

L   :      Antong talehon ma rohanta dohot sude ngolunta mamuji pasangap Goarna na badia i. Ibana do Raja na hot ro di saleleng ni lelengna, jala hita ma na nirajaanNa. Unduk ma hita mangoloi Ibana, jala sai tatiru ma bulus ni roha dohot haserepon ni rohaNa di saluhut panggulmiton ni ngolunta.

H  :      (Mangendehon BE No 49:6-7 “Sai ro ma tu bara”)

♪  Tung aha ulaning denggan ni rohaM, / silehononnami baen las ni roham?/ Ndang sere, ndang perak, ndang pinangidoM; ai roha na ias sambing do lomoM

♪  Antong rohanami ma peleanMi,/ o Jesus hasian sai jalo ma i./ Ias jala sonang ma baen angka i, tongtong gabe domu ma tu rohaMi

L   : Tapasahat ma peleanta tu Debata, martangiang ma hita!

H  : (Rap mandok Tangiang Ale Amanami)

L   : Pasupasu

H  : (Mangendeheon) Amen, Amen , Amen.

III.   MAKAN BERSAMA

IV.     PERAYAAN